OOR DIE PROJEK

Die gewilde ATKV-Crescendo vier in 2017 sy 41ste bestaansjaar! Die ATKV bied met trots hierdie projek aan as geleentheid en platform vir alle voornemende liedjieskrywer-sangers om hul talent en drome uit te leef. Sedert die ontstaan van Crescendo is talle bekende name in die Suid-Afrikaanse musiekbedryf deur middel van hierdie projek bekend gestel. Dink maar aan Anneli van Rooyen, Randall Wicomb, Karen Hougaard, Anna Davel, Jak de Priester, Jay, Joe Niemand en nog baie ander.

Van 2014 af is landwye oudisies in Potchefstroom, Stellenbosch, Mitchells Plein, Atlantis, Bloemfontein, Kimberley, Oudtshoorn en Kaapstad gehou en jaarliks word hierdie voetspoor van die ATKV groter met meer oudisies in meer streke. Alle oudisies word voorafgegaan deur reklame by hoërskole deur die ambassadeur van die projek, Hemelbesem. Hierdeur word die jeug bewus gemaak van die projek en aangemoedig om deel te neem. Hemelbesem dra die boodskap duidelik oor: Maak nie saak watter genre jy sing of skryf nie, of in watter styl of met watter aksent nie, ons wil dit hoor! Gospel, hiphop, jazz, reggae, klassieke musiek, kontemporêr en pop maak alles deel uit van die talent en musiek wat tydens die finaal van ATKV-Crescendo gehoor word.

Ontdek, ontwikkel, ontplooi – hierdie drie woorde beskryf die verloop van die projek. Die finaliste wat tydens die oudisies gekies word, kry die geleentheid om ’n mentorprogram van ses maande, genaamd ATKV-Liedjieslypskool, by te woon. Hulle ontvang opleiding in groepe en ook deur individuele sessies deur van die land se beste kunstenaars soos Hemelbesem, Anna Davel, Bouwer Bosch en Melissa van der Spuy. 

Die eindresultaat is ’n finale slypskool en konsert by ATKV-Goudini Spa. Die finaliste word deur die Crescendo-orkes begelei en gaskunstenaars tree saam met hulle op.

ATKV-CRESCENDO 2017: FINALISTE

Die finaliste vir ATKV-Crescendo 2017 is bekend en promosievideo's sal in die volgende paar week op die ATKV se Facebookblad verskyn. Hier is die finaliste wat reeds aan die publiek bekend gestel is. Hulle gaan op 9 Desember aan die ATKV-Crescendo-musiekfees by ATKV-Goudini Spa gaan deelneem. Kaartjies kos R60 en is by Computicket beskikbaar.

Klik hier vir die finaliste.

 

 

ATKV-CRESCENDO - VIDEO'S

ATKV-Crescendo is nie ’n talentsoek-kompetisie nie, dit is ’n langpadstaptog saam met diegene wat honger na sukses.

Die dag toe Francis Brown haar oudisie vir die ATKV-Crescendo-kompetisie afgelê het, het haar papier gebewe van “wes na oos”. Maar die 63-jarige “doodgewone moedertjie” van Atlantis in die Wes-Kaap het haar slag gewys en spog nou met haar eie musiekvideo, “Bruin kind”. Lees meer hier.

Die Song wil my nie los nie is ’n ATKV-Crescendo-produksie wat jou hartsnare sal roer. Hierdie produksie vertel die stories van sewe finaliste van Crescendo 2015. Met teks en regie deur Hennie van Greunen word gehore landwyd meegevoer met stories wat jou saam sal laat huil en lag.

Vertel vir my jou storie, sing vir my jou song, en miskien kan ons mekaar beter verstaan...

Die temalied van ATKV-Crescendo, Die song wil my nie los nie, kan afgelaai word by iTunes en alle fondse word gebruik om ’n musiekopleidingsentrum in Atlantis te begin. Hierdie lied wat deur Daphne Moses van Atlantis, en finalis van ATKV-Crescendo 2015, geskryf is, is ook deur Anna Davel opgeneem. Dit is nie net die temalied van die projek nie, maar word ook aangewend tot voordeel van die inwoners van Atlantis, want dit gaan oor tweede kanse en drome wat wel waar word!  

CD VAN ATKV-CRESCENDO: GRENSLOOS

crescendo thumb

Jy kan nou jou kopie van die ATKV-Crescendo-CD, Grensloos, bestel. Die CD kos R60 vir ATKV-lede en R80 vir nie-lede.

Die amptelike Crescendo-CD heet Grensloos, wat ook die titel van 2016 se Crescendo-finaal was. Die album bevat opnames van die 2015-finaliste se eie komposisies, en gee ook ʼn voorsmakie van 2016 se talent. Die doel van die CD is om, nes die ATKV-Crescendoprojek, blootstelling aan nuwe kunstenaars en nuwe klanke te gee . Die album bevat ook opnames deur die mentors. 

Grensloos is ‘n konsep wat deur die Crescendo-opleiding-en-ontwikkelingsprogram bekend gemaak is. Die program word bedryf deur EXP, wat staan vir Enhancing the excellence in People. Die organsasie se leuse (“I am borderless because I am a resource and I am resourceful”) vorm die basis van die Crescendo-program se opleiding. 

Stuur ’n e-pos na crescendo01@atkv.org.za met JOU NAAM en VAN, ADRES, TWEE KONTAKNOMMERS, ATKV-LIDNOMMER (indien van toepassing) en die BEWYS VAN BETALING.

Die bankbesonderhede is soos volg:

ATKV
Absa
Takkode: 632005
Rekeningnr: 0170166728
Verwysing: CrescendoCD

Luister na een van die snitte op die CD hier

Nuus

Page 1 of 7 FirstPrevious [1]2345 Last

Dokumente

Galery