WIE IS DIE VRIENDE VAN AFRIKAANS

Ons is ’n groep mense wat werk vir Afrikaans. Ons is nie polities, seksisties, rassisties of godsdiensvoorskriftelik nie. Kortom, almal wat  met ons wil saamwerk, is hartlik welkom.

Waar kom ons vandaan? Vanjaar, 21 jaar gelede, het ’n klein groepie Afrikaanssprekendes  hierdie vereniging op 8 Februarie 1994 in Stellenbosch gestig onder die ywerige leiding van mnr Willem Dempsey (op sy dag 'n dosent, senator, burgemeester en oud-ambassadeur) en prof Johan Combrink, ’n bekende taalkundige en ’n vurige kampvegter vir Afrikaans. Hy het die VVA se hoofkantoor in Stellenbosch gevestig. Johan se geesdrif en ywer vir Afrikaans was aansteeklik, ook omdat hy Afrikaans meesterlik kon gebruik.

Ná sy dood op 25 Julie 1999 is sy werk deur sy vrou, dr Louise Combrink, voortgesit tot en met die insluiting by die ATKV in Sept 2014. Sy is ondersteun deur  'n Spitsraad, 'n woord wat Johan gebruik het vir die ywerige vrywilligers wat vir 21 jaar onbaatsugtig vir Afrikaans gewerk het.

Waarvoor staan ons bekend? Ons vlagskipprojek is ons boektrommels vol heerlike boeke wat by verdienstelike skole en kleuterskole besorg word, ons nuusbrief (Doendinge vir Afrikaans) en ook ons voorleesprojek wat die belang van voorlees in elke Afrikaanse huis wil tuisbring.

Wie doen hierdie werk? Amanda de Stadler (amandad@vva.atkv.org.za) en Chareldine van der Merwe (chareldinev@vva.atkv.org.za). Kontak ons asseblief met raad en daad - daarvan het ons nooit genoeg nie!

 

Die simboliek van ons logo

Die bekende kunstenaar, Piet Grobler, het die boompie as logo vir ons geskep omdat ons die eienskappe van geworteldheid, groei en lewe met Afrikaans vereenselwig. Die rooi deel van die stam het Piet gebruik enersyds omdat rooi die kleur van lewe is, maar dit is ook ’n speelse verwysing na die rooi akkerbome van Stellenbosch, die geboorteplek van die Vriende van Afrikaans.

Nuus

Page 1 of 11 FirstPrevious [1]2345 Last

Dokumente

Page 1 of 4FirstPrevious[1]234NextLast

Galery